Ejne wuhre Begebenhejt: Onso pech bei do Ziechazocht.

Onse Ziechageschechte

Mir mußta naus, mir mußta giehn,
mir mußta ei die Fremde ziehn,
dobein houn mir ganz ungeloocha,
a noch dous temmste Luus gezoocha.
Mir kouma ne ei´s gelobte Land,
mir kouma ou a Ostseestrand.

Dous wor schun glei sehr negativ
on monch andores lief a noch schief,
doch kriechta mir zum Gleck Quotier
on noch on noch do hotta mir,
ons ieworoul schun emgeton
on ons a beßla wous eifolla gelon.

Ma besoun sich of Pauotalente,
wos ma ei do Stoudt damit macha kennte
Do houn mo halt enn Stoul gebaut,
vo Kaserna houn mo´s Holz geklaut,
dann kaaft mo ons a Ziechla nei,
denn Viehzocht brengt bestemmt wous ei.
On secholich fier onsre Kendo,
is Ziechamelch doch viel gesendo.

Dann wor´s suweit, wie die Wocha vogiehn,
ma mußt met do Zieche zum Bocke ziehn.
Dous machte Uhfsahn, metta dorch die Stoudt,
es hot halt of do Hauptstrooß seld´n Ziecha gehout.

Dann wur die Zieche zwor immo decko,
doch schließlich dann om letzta Drecko,
mußt do Tierarzt entscheida driewo
on er sort zu mir: "Mei Liewo,
Nachwuchs gibts nicht, weil ganz gewiß,
ihre Ziege ein halber Ziegenbock is."

Also olles wor schiefgeganga,
met dam Viech wor nischt ouzufanga,
kejne Ziechlan, kejne Melch hots gegan,
mir houn se bloß mitlejdioh ougesahn,
doch sie wor tecksch, halt ne ganz echt,
dous louch ou ihrom zweedeiticha Geschlecht.

Su stound se notzlos jetz eim Stolle,
do dochta mir, ei diesom Folle,
wärs dous beste wos mo machta,
dous Tier ganz ejfach schworz zu schlachta.
Eim Gorta wor do Mord gedocht,
mir houn die Zieche hiegebrocht,
grußschnauzich hou ich ougegan,
ich mach´s, kej Mensch wat etwous sahn.

Ich mach se tuut on schlacht se aus,
do houn mo en Zentno Flejsch eim Haus,
die Flejschmarka houn mo noch nawabei,
jou su brengt die Zieche ons noch etwous ei.

Doch korz gesort, ich kunnt ne drou,
die Zieche souch mich traurich ou,
do hou ich mich schnell emgedreht
on hou´s Masso wiedo weggeleet.
Doch dous Urtejl wor gesprocha,
do sein mo jetze uhfgebrocha,
zum Schlachthof zerrt mo´s Ziechatier,
dous wor wull sehr gemein vo mir.

Doch danne wor dous Tier geschlacht,
mir houn echte Salami do draus gemacht
on dovon mußt mo mondalang lawa.
Denn om Schlachthof stound a Beomto donawa,
Hausschlachtung sort er zum guda Zweck
on 5 Monda worn die Flejschmarka weg.

Dous hot ons doch a Rest gegan
on mir houn endlich eigesahn,
doß Landwirt schoft ei su enno Stoudt,
hot werklich kejnen Senn gehout.
Doch diese Geschechte vom fufzicho Juhr,
sol zeicha, wos olles ougepackt wur,
wos noch do Votreibung mir olles ondonumma,
um wiedo of en grinn Zweig zu kumma.
Met do Zwittozieche is es schief geganga,
doch mir houn glei wos Neies ougefanga
Mir worn halt fleißich, houn met ejchono Kroft,
ons schließlich a neies Lawa geschofft.